അതേ,പ്രതികാരബുദ്ധിയുള്ള ഒരാളാണ്!
മിഡില്‍ ഈസ്റ്റില്‍ വീസ റിലേറ്റഡ് ജോലികളൊക്കെ ചെയ്തിരുന്ന ഒരു കാലമുണ്ടായിരുന്നു.അത്യാവശ്യം MNC എന്നൊക്കെ വിളിക്കാവുന്ന ഒരു കമ്പനിയുടെ PRO പട്ടമെന്നാല്‍ അല്‍പ്പം നിഗളിക്കാനോ കമ്മീഷന്‍ കാശുണ്ടാക്കാനോ അധികാരത്തിന്റെ ഗര്‍വ്വ് കാണിക്കാനോ ഒക്കെ പറ്റുമായിരുന്ന സമയമാണ്.
മേല്‍പ്പറഞ്ഞതില്‍ എന്തെങ്കിലും ചെയ്തോ എന്ന് കൂടെയുണ്ടായിരുന്നവര്‍ പറയട്ടെ.
അന്നത്തെ ഒരു സംഭവമാണ് ഓര്‍മ്മയില്‍.ചെയിന്‍ സ്മോക്കറായ ഒരാള്‍ എന്നെ കാണുമ്പോള്‍ പലപ്പോഴും എരിയുന്ന സിഗററ്റ് മറച്ചുപിടിച്ച് വല്ലാത്തൊരു ബഹുമാനം കാണിക്കും.അങ്ങനത്തെ ഫോര്‍മാലിറ്റികളൊന്നും വേണ്ടെന്ന് പറഞ്ഞ് ആ അഭ്യാസത്തെ നിര്‍ത്തുകയാണുണ്ടായത്.രസകരമായ കാര്യമെന്തെന്നാല്‍ ജോലി മതിയാക്കി നാട്ടില്‍ പോരുകയാണെന്ന് പറഞ്ഞ ദിവസങ്ങളില്‍ അദ്ദേഹം പല തവണ എന്റെ ദര്‍ശനമാത്രയില്‍ എവിടെനിന്നെങ്കിലും സിഗററ്റ് വലിച്ചൂരി കത്തിച്ച് എന്റെ മുഖത്തേയ്ക്കെന്നപോലെ പുക ഊതി വിടാന്‍ വരെ ശ്രമിക്കുമായിരുന്നു.
ആശ്ചര്യവും ഇറിറ്റേഷനും സഹതാപവുമൊക്കെ തോന്നിപ്പോയി.
അദ്ദേഹത്തിന്റെ വ്യക്തിസ്വാതന്ത്ര്യത്തില്‍ എന്തെങ്കിലും കടന്നു കയറ്റ ശ്രമം നടത്തിയ ആളായിരുന്നു ഞാനെങ്കില്‍ ഈ പ്രതികാരം ന്യായീകരിക്കപ്പെടുമായിരുന്നു.ഇന്നീ പിച്ചക്കണക്ക് എഴുതപ്പെടുകയുമില്ലായിരുന്നു.
ചില അന്‍പു സഹോദരിമാരുടെ ഇന്‍ഫാക്ച്വേഷനുകളും ഇതേ പാറ്റേണില്‍ തന്നെ.വാ തുറന്ന് ഒന്നും സംസാരിക്കുകയോ തീരുമാനിക്കുകയോ തീരുമാനങ്ങളെ മാനിക്കുകയോ ഇല്ല.പകയും പ്രതികാരവും കൊതികുത്തും അനസ്യൂതം തുടരുകയും ചെയ്യും.എന്റെ ഹസ്സിന്റെ 'അതു കണ്ടോ,ഇതു കണ്ടോ'..അതൊക്കെ നിങ്ങള്‍ ഒറ്റയ്ക്ക് കണ്ടോളൂ..എനിക്കതൊന്നും കണ്ട് പുളകം കൊള്ളുന്ന ശീലം ഇല്ലാത്തതുകൊണ്ടാ.
'പണ്ടെന്റെ മൗനരാഗത്തെ അവഗണിച്ച നീ കഷ്ടപ്പെടുന്നു.ഞാനിങ്ങനെ സുഖിക്കുന്നു'..ഇതൊക്കെ അനവസരത്തില്‍ പറയുന്നവരോട് സഹതപിക്കാം.മൗനരാഗം അവഗണിച്ച് സുഖിക്കാന്‍ അവസരം തന്ന എന്നോട് നന്ദി പറയുകയല്ലേ വേണ്ടത്!
അവരുടെ മനസ്സിലെ സങ്കല്‍പ്പങ്ങള്‍,അത് തകര്‍ന്നാല്‍ അവര്‍ വേറൊരാളുടെ മുകളില്‍ കുതിര കയറുന്നു.എത്ര യുക്തിഭദ്രവും നീതിപൂര്‍വ്വകവുമായ പ്രവൃത്തിയാണല്ലേ?
എന്റെ ജീവിതത്തിലെ ജോലി ചെയ്യാന്‍ തുടങ്ങിയ കാലം മുതലുള്ള കാര്യം ഓര്‍മ്മിച്ചാല്‍ അപ്പാ എന്നു വിളിച്ചോണ്ടിരുന്ന ആളെ ഞാനിപ്പോഴും അങ്ങിനെ തന്നെ ആണ് വിളിക്കാറ്.അങ്കിള്‍,ആന്റി,ചേട്ടായി,ചേച്ചി ഇങ്ങനെയൊക്കെ വിളിച്ചവരേയും അങ്ങിനെ തന്നെ വിളിച്ചു പോരുന്നു.(തെറി പറയാന്‍ ഡയറക്ടായ കാരണമുണ്ടാക്കി തന്നാല്‍ പറയും.അതു വേറെ വിഷയം).ഇതിനിടെ അപ്പനും അങ്കിളും മറ്റുളളവരുമൊക്കെ സാമ്പത്തികമായും ശാരീരികമായുമൊക്കെ പല അവസ്ഥാ വ്യത്യാസങ്ങളിലൂടെയും കടന്നു പോയി.പല ജോലികള്‍ ചെയ്തു.ജോലി ഇല്ലാതായി.ശാരീരികശേഷി കുറഞ്ഞു.മരണാസന്നരായി ആശുപത്രിയില്‍ കിടന്നു.എടാ അപ്പാ,എടാ ചേട്ടായീ എന്ന് ആരെയെങ്കിലും വിളിച്ചതായോ പഴയ സമീപനങ്ങളില്‍ മാറ്റം വരുത്തിയതായോ ഓര്‍ക്കുന്നുണ്ടോ?!!
പക്ഷേ എന്നോടുള്ള സമീപനങ്ങളോ?മാഷ്,സാറ്,പേര്,ഭയ്യാ (മിഡില്‍ ഈസ്റ്റില്‍ ഈ വിളി അല്‍പ്പം മാന്യമാണ്),ഭായീ (ഇൗ വിളിയുടെ ടോണില്‍ തന്നെ പുച്ഛം നിഴലിക്കും,മിക്കപ്പോഴും),മാ,പൂ ..ഇതൊന്നും വ്യക്തിപരമായ വിരോധത്താല്‍ മാറി വന്ന വിളികളല്ല.ഞാന്‍ എന്റെ കരിയര്‍ മാറ്റിയതിലുള്ള പ്രതികരണം.
പ്രിയരേ,ഒന്നേ പറയാനുള്ളൂ..ഞാന്‍ നിങ്ങള്‍ക്കോ നിങ്ങള്‍ എനിക്കോ ഔദാര്യമൊന്നും ചെയ്യാത്തിടത്തോളം കാലം വെറുതേ മലര്‍ന്നു കിടന്നു തുപ്പുന്നതുപോലെ ഇങ്ങനെ ഓന്തിന്റെ സ്വഭാവം കാണിക്കണോ?
ഇത് മതിപ്പ് ഉണ്ടാക്കാനും മതിപ്പ് കുറഞ്ഞു എന്നു സൂചിപ്പിക്കാനും വേണ്ടിയാണെങ്കില്‍ ശരിയായ ഫലപ്രാപ്തി ഉണ്ടാവുന്നുണ്ടോ എന്ന് ദയവായി പരിശോധിക്കുക.
നിങ്ങളുടെ വിജയഫോര്‍മുലയാണ് ഈ ഓന്ത് സ്വഭാവം എങ്കില്‍ പറഞ്ഞോട്ടെ..
നിങ്ങളുടെ കരിയര്‍,റിലേഷന്‍ഷിപ്പ് തിരഞ്ഞെടുപ്പുകളുടെ പേരില്‍ എന്നെ ഹ്യുമിലിയേറ്റ് ചെയ്താല്‍,എനിക്കൊരവസരം വരുമ്പോള്‍ അതു തന്നെ ചെയ്യും.
ഒന്നുമില്ലാത്തവനായിരിക്കുമ്പോള്‍ ഈ പ്രഖ്യാപനം നടത്തിയില്ലെങ്കില്‍ അവസരവാദി ആയി പോകുമല്ലോ!!അതാണ് ഇപ്പോള്‍ ഇത് പറഞ്ഞത്.
No comments:
Post a Comment