അങ്ങിനെയൊരു ചോദ്യത്തിനും പ്രസക്തിയില്ലേ?
യേശു ഇന്ന് നമ്മളുടെ നാട്ടില്‍ അതേ കെട്ടിലും മട്ടിലും ജനിച്ച് വളര്‍ന്നാലോ?
യേശുവിന്റെ അമ്മ പുരുഷനെ അറിയും മുന്‍പേ ദൈവനിവേശിതമായി ഗര്‍ഭിണി ആയ ആളാണ്.പണം കൊണ്ടും സ്വാധീനം കൊണ്ടും സംരക്ഷിക്കാനാരുമില്ലാത്ത ഒരു പാവപ്പെട്ട കുടുംബത്തിലെ പെണ്‍കുട്ടി ഇന്ന് ഇത്തരമൊരു വെളിപ്പെടുത്തലുമായി നമ്മുടെ കണ്‍മുന്നില്‍ വന്നാല്‍...എന്താകും അവളുടെ അവസ്ഥ??!!ദയവായി നിത്യജീവിതത്തിലെ നമുക്ക് വിശ്വസനീയമല്ലാത്ത (അവിഹിത) കഥകളുമായി കൂട്ടിവായിക്കുക.
അവളുടെ പുരുഷന്‍ മാന്യതയുടെ നിറകുടമായിരുന്നതുകൊണ്ട് ആ പ്രശ്നം അവസാനിച്ചു.പക്ഷേ അയാള്‍ ഒരു മരപ്പണിക്കാരനായിരുന്നു.സമൂഹത്തിന്റെ തരംതിരിവുകളില്‍ താഴെത്തട്ടില്‍ മാത്രം എന്നും ഉണ്ടായിരുന്ന ഒരാള്‍.സാമ്പത്തികമായും അങ്ങിനെ തന്നെ.അദ്ദേഹത്തിന് ക്രെഡിറ്റ് കാഡോ ക്ളമ്പുകളില്‍ മെമ്പര്‍ഷിപ്പോ ബന്ധുവീടുകളിലെ ആഘോഷങ്ങളില്‍ മാനുഷികപരിഗണനയോ ഒന്നും ലഭിക്കുമായിരുന്നില്ല.
യേശു ജനിച്ചത് കന്നുകാലികളെ കെട്ടിയിരുന്ന സ്ഥലത്തിനടുത്ത് ഒരു ഭൂഗര്‍ഭ ഗുഹയിലാണ്.സ്നേഹവും പരിചരണവും വാരിവിതറാന്‍ ആരുംതന്നെ ഉണ്ടായിരുന്നില്ല!
പന്ത്രണ്ടാം വയസ്സില്‍ അദ്ദേഹത്തെ ദേവാലയത്തില്‍ കാണാതെ പോയി.വലിയ ബിരുദങ്ങളുള്ളവരുമായി തര്‍ക്കിച്ചുകൊണ്ടിരിക്കേയാണ് കണ്ടുപിടിച്ചത്.മാതാപിതാക്കള്‍ കുട്ടിയെ
നല്ലൊരു ധ്യാനം/പൂജ/മന്ത്രം ല്‍ പങ്കെടുപ്പിക്കാനോ ഡോക്ടറെ കാണിക്കാനോ ഉള്ള എല്ലാ വകുപ്പും ഉണ്ടായിരുന്നു.അവരതു ചെയ്തു കാണില്ല.കഷ്ടം തോന്നുന്നില്ലേ?ഒരു കുട്ടിയുടെ ഭാവിയല്ലേ ചികിത്സയില്ലാതെ നശിപ്പിച്ചത്!
പിന്നീടുള്ള കുറേ സംവത്സരങ്ങള്‍ കരിയറില്‍ വലിയ ഗ്യാപ്പ് ആയിരുന്നു.ആ സമയത്ത് എന്തു ചെയ്യുകയായിരുന്നു എന്നതിന് രേഖകളില്ല.യൂണിവേഴ്സിറ്റിയില്‍ പഠിച്ച് സര്‍ട്ടിഫിക്കറ്റ് വാങ്ങിയില്ല;കോര്‍പ്പറേറ്റ് ജോലി ചെയ്ത് സാലറി സ്ളിപ്പോ എക്സ്പീരിയന്‍സ് സര്‍ട്ടിഫിക്കറ്റോ കരസ്ഥമാക്കിയില്ല.ഇനി ആസ്ത്രേലിയ,കാനഡ,ന്യൂസീലാന്റ് എന്തിന് ഫിലിപ്പൈന്‍സിലോ മാള്‍ട്ടയിലോ എങ്കിലും പോകാമ്പറ്റുമോ?ഏതെങ്കിലും കോര്‍പ്പറേറ്റ് കമ്പനിയില്‍ ജോലി കിട്ടുമോ?ഏജ് ഓവറായാല്‍ പി.എസ്.സി.പഠിച്ച് പരീക്ഷ എഴുതാന്‍ പറ്റുവോ?
മാതാപിതാക്കളേയും നാട്ടുകാരേയും സഹായിച്ചും വിധേയപ്പെട്ടും സമയം ചിലവഴിച്ചുവത്രെ!എന്തൊരു മണ്ടത്തരമാണ്!
പൊതുജീവിതത്തിന് ഇറങ്ങി ആദ്യം പോയത് സ്നാപകയോഹന്നാന്‍ എന്നൊരു അരപ്പിരിയന്റെ അടുത്തേയ്ക്ക്..നല്ല പ്രതാപികളായ തലതൊട്ടപ്പന്‍മാരില്ലാതെ പൊതുപ്രവര്‍ത്തനത്തിനിറങ്ങിയാല്‍ ഗുണം പിടിക്കുവോ??!!
ശിഷ്യന്‍മാരായി കൂടെ കൂട്ടിയത് രാഷ്ട്രീയസ്വാധീനവും ഗ്ളാമറുമില്ലാത്ത വെറും മുക്കുവന്‍മാരെ!!സായിപ്പും മദാമ്മയും ഡോക്ടറും IAS കാരനും ജഡ്ജിയും ശിഷ്യനല്ലാത്ത ഏതെങ്കിലും ആള്‍ദൈവം വിജയിച്ചിട്ടുണ്ടോ??!!അവിടേയും മണ്ടത്തരമല്ലേ പുള്ളി കാണിച്ചത്..അത്ഭുതമൊക്കെ കാണിച്ച് കൊള്ളാവുന്ന പത്തു പേരെ കൂടെ കൂട്ടിയിരുന്നെങ്കില്‍ ആ പത്തുപേര്‍ അതുപോലെ നൂറു പേരെ കൊണ്ടുവരുമായിരുന്നല്ലോ!!
രാജാക്കന്‍മാരുടെ വിരുന്ന് സ്വീകരിക്കാന്‍ പോയില്ല!!പിന്നെയെന്താണ് ഈ പൊതുജീവിതത്തിന്റെ രസം??!!
പാപിനിയായ സ്ത്രീയെ കല്ലെറിഞ്ഞു കൊല്ലാനൊരുമ്പെട്ടവരെ തടഞ്ഞു..അവിഹിതവും വേശ്യാവൃത്തിയും നടത്തുന്നവരെ മാതൃകാപരമായി ശിക്ഷിക്കുന്നതിനെ തടയുക എന്നൊക്കെ പറഞ്ഞാല്‍ എന്താണല്ലേ??!!മാക്സിമം ജനവികാരത്തെ ചൂഷണം ചെയ്യുന്ന നിലപാടല്ലായിരുന്നോ എടുക്കേണ്ടിയിരുന്നത്??!!മണ്ടത്തരം..
രോഗികളെ സുഖപ്പെടുത്തി..ഒരു കൃപാസനപരസ്യമോ സാക്ഷ്യമോ കൂടാതെ അങ്ങിനെ രോഗികളെ സുഖപ്പെടുത്താന്‍ പാടുണ്ടോ??!പിന്നേയും മണ്ടത്തരം!!
ദേവാലയത്തിലെ കച്ചവടക്കാരെ പുറത്താക്കി..എന്തൊരക്രമമാണല്ലേ??!!ദേവാലയം,നേര്‍ച്ച,കച്ചവടം ഇതെല്ലാം ഒരമ്മപെറ്റ മക്കളല്ലേ??അവരെ പിരിക്കാന്‍ പാടുണ്ടോ??!!മെഴുകുതിരി,അടിമവെപ്പ്,ജമന്തിപ്പൂ,ആള്‍രൂപം..കച്ചവടമില്ലാടെ എന്തു ദേവാലയം??!!
സ്ത്രീകള്‍ക്ക് പൊതുസഭയില്‍ ആയിരിക്കാനും സംസാരിക്കാനും അവസരം കൊടുത്തു!!തലകള്‍ 'വിരിഞ്ഞി'രിക്കുന്നിടത്ത് വാല് ആട്ടാന്‍ പെര്‍മിഷനേയ്!!!
സാബത്തിന് ഭക്ഷണം കഴിച്ചവരെ ന്യയീകരിച്ചു!!ഫരിസേയരുടേയും സദുക്കായരുടേയും പുളിമാവിനെ വിമര്‍ശിച്ചു!!അണലിസന്തതികളെന്ന് വിളിച്ചു!!തെമ്മാടിക്കുഴിക്കും പുറത്ത് ഇടമുണ്ടെങ്കില്‍ അവിടെ കുഴിച്ചിടുവിക്കാനുള്ള എല്ലാ പണിയും ഒപ്പിച്ചു..
സ്നേഹത്തിന്റെയും മര്യാദയുടേയും കല്‍പ്പന നല്‍കി.മറ്റുള്ളവര്‍ നിന്നോട് എങ്ങിനെ പെരുമാറണമെന്ന് നീ ആഗ്രഹിക്കുന്നുവോ അപ്രകാരം നീ അവരോടും പെരുമാറാന്‍!!!എന്താല്ലേ??!!മുതലാളിയും പ്രമാണിയും സുന്ദരനും കരുത്തനു നാക്കിന് ഫ്ളെക്സിബിലിറ്റി ഉള്ളവനുമായ
എന്നോട് അവര്‍ നന്നായി പെരുമാറട്ടെ..തിരിച്ച് നന്നായി പെരുമാറിയില്ലെങ്കില്‍ അവരെന്നെ എന്തു ചെയ്യും??അടുത്തകൊല്ലം വെള്ളപ്പൊക്കം വരുമെന്ന് കരുതി ഇപ്പളേ മുണ്ട് പൊക്കിപ്പിടിക്കണോ??ആനമണ്ടത്തരം!!
പ്രമാണിമാരുമായി കോമ്പ്രമൈസ് ഡീലുകള്‍ക്ക് പിന്നീടും സമയമുണ്ടായിരുന്നു..ചെയ്തില്ല..
തനിക്ക് ആര്‍പ്പുവിളിച്ച ജനക്കൂട്ടം 'അവനെ ക്രൂശിക്കുക' എന്നു വിളിച്ചു പറയുന്നത് മൂകനായി കേട്ടുനിന്നു..ഇളയദളപതി പടങ്ങളിലേതു പോലെ ജനവികാരത്തെ തിരിച്ചു വിട്ടില്ല!
മനുഷ്യന് സാധ്യമായ എല്ലാ പീഡകളും സഹിച്ച് മരിച്ചു.
എന്റെ പ്രിയ ക്രിസ്ത്യാനി സ്വന്തക്കാരേ,സുഹൃത്തുക്കളേ..
യേശു നമ്മുടെ ഇടയില്‍ ഇന്ന് ഉള്ള ഒരാളാണെങ്കില്‍ നിങ്ങളവനെ എന്തു ചെയ്യുമായിരുന്നു??!!എങ്ങിനെ സ്വീകരിക്കുമായിരുന്നു?!!എങ്ങിനെ പീഡിപ്പിച്ച് കൊല്ലുമായിരുന്നു??!!
ഈ ചോദ്യങ്ങള്‍ക്ക് തൃപ്തികരമായ (ഫിഷിയായ ക്ളോസൊന്നുമല്ല;തൃപ്തിയായാല്‍ തൃപ്തിയെന്ന് സത്യസന്ധമായി സമ്മതിക്കും..അതില്‍ ഒരു ദുരഭിമാനപ്രശ്നവുമില്ല)ഉത്തരം തരാനാകുന്നവര്‍ എന്നെ വിശ്വാസകാര്യങ്ങളില്‍ ഉപദേശിച്ചാല്‍ മതിയാവും..വിരട്ടലും വിലപേശലുമൊന്നും വേണമെന്നില്ല..
എന്തിന് ഇതൊക്കെ പൊതുവായി എഴുതുന്നു എന്നു ചോദിച്ചാലും മറുപടിയുണ്ട്.
മര്യാദയുടെ പേരില്‍ ഒരു ചായ വാങ്ങിത്തരേണ്ടി വരുമെന്ന് ഭയന്ന് എന്നെ നിരീശ്വരവാദിയെന്നൊക്കെ വിളിച്ച് മുറിപ്പെടുത്തിയ ഒരുപാട് അല്‍പ്പന്‍മാരുമായി കണ്ടുമുട്ടിയിട്ടുണ്ട്..അന്ന് ഞാന്‍ കുട്ടിക്കാലത്തെ കുരിശുവരയുടേയും പള്ളിപ്പെരുന്നാളിന്റേയും നൊസ്റ്റാള്‍ജിയയില്‍ ജീവിക്കുന്ന/നിരീശ്വരവാദിയെന്നൊക്കെ ഏതു കളളക്കച്ചവടക്കാരന്‍ വിളിച്ചാലും സങ്കടപ്പെടുന്ന ഒരു പൊട്ടനായിരുന്നു..ഇന്ന് ചില പൊട്ടത്തരങ്ങളൊക്കെ തിരുത്താന്‍ ശ്രമിക്കുന്നു.
ക്രിസ്ത്യാനി എന്നാല്‍ ക്രിസ്തുവിനെ അനുകരിക്കുന്നവന്‍ എന്നാണ് വെപ്പ്.ഭക്താഭ്യാസങ്ങള്‍ എന്നാല്‍ ഭക്തി അഭ്യസിക്കലാണ്;ഭക്തിയെ അഭ്യാസമാക്കലല്ല.
ക്രിസ്തുവിനെ അനുകരിക്കുന്നത് പോട്ടെ,അവനെ ക്രൂശിക്കുക എന്നു വഞ്ചകരോട് ചേര്‍ന്നു വിളിച്ചു കൂവാത്തവരെങ്കിലും ആകാമോ??!!അതിനുശേഷം നിങ്ങള്‍ നല്‍കുന്ന വിശ്വാസസാക്ഷ്യം സ്വീകരിക്കാം..വളരെ നന്ദി🙂
No comments:
Post a Comment