ഇതൊരു ചിഹ്നമാണോ?
മനോഭാവമാണോ?
മനസ്സുതന്നെയാണോ?
എല്ലാ ചിഹ്നങ്ങളും മനസ്സിന്റെ വക്താക്കള്‍ തന്നെയാണല്ലോ?!
തുടങ്ങിയിടത്ത് തിരിച്ച് വരുന്ന വരുത്തുന്ന വൃത്തം പോലെ.
നേര്‍രേഖയിലെ തിരിച്ച് വരവിനെ ശാസ്ത്രത്തിന് വിശദീകരിക്കാനായോ എന്നറിയില്ല.
ഉപകരണങ്ങളുടെ സഹായമില്ലാതെ, എന്നാല്‍ ഗൗരവത്തോടെ വൃത്തം വരക്കാന്‍ ആവശ്യപ്പെട്ടാലെന്ത് സംഭവിക്കാം?
വരക്കാന്‍ കഴിവും ആത്മവിശ്വാസവുമുള്ളവര്‍ തങ്ങളുടെ വിരലുകള്‍ സ്വതന്ത്രമായി ചലിപ്പിച്ച് ആവശ്യത്തിന് വ്യാസമുള്ള വൃത്തം വരക്കും.
കഴിവും താത്പര്യവും കുറഞ്ഞവര്‍ തങ്ങളുടെ വൃത്തങ്ങളെ അവയുടെ വളവുകളും അപൂര്‍ണ്ണതയും മറച്ചു വെക്കാനെന്നവണ്ണം ഒരു ബിന്ദുവിനേക്കാള്‍ അല്‍പ്പം കൂടി വ്യാസത്തില്‍, വേഗത്തില്‍ വരച്ചു തീര്‍ക്കും.
അമേരിക്കന്‍ ഭൂഖണ്ഡത്തില്‍ വയലുകളില്‍ കാണപ്പെടുന്ന മീറ്ററുകള്‍ വ്യാസമുള്ള (മലയാളിയായ മനോജ് നൈറ്റ് ശ്യാമളന്റെ "സൈന്‍സ്" എന്ന ഹോളിവുഡ് ചിത്രത്തിന് പ്രചോദനമേകിയ) പൂര്‍ണ്ണതയോട് ഏകദേശം അടുത്തുനില്‍ക്കുന്ന വൃത്തങ്ങളുമുണ്ട്.
വലുതോ ചെറുതോ പൂര്‍ണ്ണമോ അപൂര്‍ണ്ണമോ - വൃത്തത്തില്‍ ജീവിതം ചലിക്കുന്നു.
മൂല്യങ്ങളുടെ,ശീലങ്ങളുടെ,ഇഷ്ടങ്ങളുടെ,തീരുമാനങ്ങളുടെ,തിരഞ്ഞെടുപ്പുകളുടെ വൃത്തങ്ങള്‍.
പലവക ബുക്കില്‍ സമയം കൊല്ലാന്‍ വരച്ച് കൂട്ടിയ വൃത്തങ്ങള്‍ പോലെ.വൃത്തത്തിലെ അനന്തമായ ബിന്ദുക്കളില്‍ ചിലതിനെ കേന്ദ്രമാക്കി കൂടുതല്‍ വൃത്തങ്ങള്‍.
തെല്ലൊരു അകലത്തില്‍ നോക്കാനവസരം കിട്ടുമ്പോള്‍ ഇതെല്ലാം വരച്ചവരും വെറും ഉപകരണങ്ങള്‍ മാത്രമെന്ന് അവരെ തോന്നിപ്പിക്കുന്ന തരം അമ്പരപ്പും ആവേശവും സമ്മാനിക്കുന്ന നിര്‍മ്മിതികള്‍.
No comments:
Post a Comment