കണ്ണഴി മൂര്‍ക്കില്ലാത്തമനയ്ക്കല്‍ പബ്ജിനമ്പൂതിരിപ്പാട്

"ആസ്താം പീയൂഷലാഭസ്സുമുഖി ഗരജരാ-
        മൃത്യുഹാരീ പ്രസിദ്ധ-
സ്തല്ലാഭോപായചിന്താപി ച ഗരളജുഷോ
        ഹേതുരുല്ലാഘാതായാഃ
നോചേദാലോലദൃഷ്ടിപ്രതിഭയഭുജഗീ
        ദുഷ്ടകര്‍മ്മാ മുഹുസ്തേ
യാമേവാലംബ്യ ജീവേ കഥമധരസുധാ-
        മാധുരീമപ്യജാനന്‍"

നമ്പൂതിരിപ്പാട്: അതിവിശേഷമായ ശ്ളോകം,അല്ലേ?

ഇന്ദുലേഖാ : അതെ.

നമ്പൂതിരിപ്പാട് : കറുത്തേടം പോയി താഴത്ത് ഇരിക്കൂ.

കേശവന്‍ നമ്പൂതിരി,"ഞാന്‍ പോയി മുറുക്കാന്‍ കൊണ്ടുവരാം"എന്നു പറഞ്ഞു താഴത്തേക്കുപോയി.

നമ്പൂതിരിപ്പാട് : ഇന്ദുലേഖയ്ക്ക് കളിഭ്രാന്തുണ്ടോ?

ഇന്ദുലേഖാ : എന്തു ഭ്രാന്ത്?

നമ്പൂതിരിപ്പാട് : കളിഭ്രാന്ത് - പബ്ജി കളിഭ്രാന്ത്.

ഇന്ദുലേഖാ : എനിക്ക് ഒരുവകയായും ഭ്രാന്ത് ഇതുവരെ ഒന്നും ഉണ്ടായിട്ടില്ലാ.

നമ്പൂതിരിപ്പാട് : എനിക്കു നല്ല ഭ്രാന്താണ് - കലശലാണ് ഭ്രാന്ത്.

ഇന്ദുലേഖാ :(ചിറിച്ചുംകൊണ്ട്)ശരിതന്നെ,സംശയമില്ല.

നമ്പൂതിരിപ്പാട് : എന്താ ഇന്ദുലേഖ ഈ വിവരം മുമ്പു കേട്ടിട്ടുണ്ടോ?

ഇന്ദുലേഖാ : ഇല്ലാ.ഇപ്പോളറിഞ്ഞു.

നമ്പൂതിരിപ്പാട് : ഞാന്‍ പറഞ്ഞറിഞ്ഞു അല്ലേ?

ഇന്ദുലേഖാ : അതെ,ഇവിടുത്തെ വാക്കുകളെക്കൊണ്ടു നിശ്ചയിച്ചു.

നമ്പൂതിരിപ്പാട് : ഇന്നലെ മനയ്ക്കല്‍ കളിയുണ്ടായിരുന്നു. രാമന്റെ ഗാംഗ്സ്റ്റര്‍പബ്ജി ബഹുവിശേഷം തന്നെ.ഇന്ദുലേഖാ രാമനെ കേട്ടിട്ടുണ്ടോ?രാമന്‍,ശൂദ്രന്‍ രാമപ്പണിക്കര്‍ എന്നു വിളിക്കും.വലിയ ഊറ്റക്കാരനാണ്.റ്റോപ്പ് കില്ലര്‍.ഹെഡ് ഷോട്ട്സ്.ഇന്ദുലേഖയ്ക്ക് ഇനി ദിവസംപ്രതി കളികാണാം.എനിക്കു നല്ല കളിഭ്രാന്താണ്.ഇശ്ശി മിക്കവാറും ദിവസം കളി ഉണ്ടാവാറുണ്ട്.ഇന്നലെ ഡെത്ത്ഏഞ്ചല്‍പബ്ജിയെന്നൊരു വേഷവും കണ്ടു.ഇയ്യടെ ഒന്നും ഇങ്ങനെ കണ്ടിട്ടില്ല.സൊനാലി,സൊനാലി എന്നൊരു കേമി.സൊനാലിയെ ഇന്ദുലേഖ അറിയുമോ?അവള്‍ ഒന്നു ഫേഷ്യല്‍ ചെയ്യാതിരുന്നാല്‍ ഇന്ദുലേഖയുടെ മുഖംപോലെതന്നെ.അങ്ങിനെതന്നെ - ഒരു ഭേദവുമില്ല.ഇവിടെ കളി കൂടെക്കൂടെ ഉണ്ടാവാറുണ്ടോ?

ഇന്ദുലേഖാ : ഇല്ല.

നമ്പൂതിരിപ്പാട് : എത്ര കൊല്ലമായി ഇന്ദുലേഖ പബ്ജി കളിച്ചിട്ട്?

ഇന്ദുലേഖാ : നാലഞ്ചു കൊല്ലമായി എന്നു തോന്നുന്നു.

നമ്പൂതിരിപ്പാട് : ശിവ! - ശിവ! നാലഞ്ചുകൊല്ലമോ?ഇത്ര സ്മാര്‍ട്ട്ഫോണുള്ള ഇല്ലത്ത് പബ്ജി കളിച്ചിട്ട് നാലഞ്ചു കൊല്ലമോ?ആശ്ചര്യം!അതിന്റെ പരിജ്ഞാനം ഇല്ലാഞ്ഞാല്‍ അത്രേ ഉള്ളൂ.പഞ്ചുവിനും പരിജ്ഞാനം ഒട്ടും ഇല്ലായിരിക്കും.പിന്നെ ഇന്ദുലേഖ എന്തുചെയ്യും?

ഇന്ദുലേഖാ : അതെ!ശരിതന്നെ.

ചുരുളഴിയാത്ത രഹസ്യങ്ങള്‍

"അപ്പാ,നമ്മ പുതു കോര്‍ട്ടുയാര്‍ഡ് കൊഞ്ചം കൂടെ ഈവന്‍ കെടയാത്!ഇന്തമാതിരി ഗ്രാസ്സ്,ഗ്രൂസ്സുക്കുള്ളെ എപ്പടി കോലം പോടുവേന്‍?"

"ചെല്ലം,അഗ്രഹാരപെട്ടകം ലാന്റ് പണ്ണറുതുക്ക് തായ്ഗ്രഹത്തോടെ ഡൈറക്ഷന്‍ പാക്കറത് സമ്പ്രദായം താനേ?അതിനാലെ ഇന്ത ഗ്രാസ്സ്;പൂച്ചി എല്ലാം.."

"ചരി!കോലം പോടറുത്ക്ക് എന്ന സജഷനിരിക്കും ഉങ്കള്ക്കിട്ടെ?"

"കണ്ണേ,കോര്‍ട്ട്യാര്‍ഡെ കാലാലെ കൊഞ്ചം സരി പണ്ണി വിടമ്മാ"

അങ്ങിനെ ഏത്തീസിന്റെ പതിനെട്ടുമുഴം ചേല തെല്ലൊന്നുയര്‍ത്തിപ്പിടിച്ച് ഏലിക്കാസ് സ്വര്‍ണ്ണക്കൊലുസണിഞ്ഞ പുഷ്പപാദങ്ങളാലേ കുമാരി വേശുമണി ഏലിയങ്കാര്‍ വരച്ച കോലങ്ങളാണത്രേ വിള വലയങ്ങള്‍.

അനുബന്ധം:ഷേക്സ്പിയര്‍ തമിഴ്നാട്ടില്‍ നിന്നും കപ്പലു കയറിയ ഷേര്‍പ്പാ അയ്യര്‍ എന്നൊരാളാണത്രെ.

നഞ്ച്

ദൗത്യം വളരെ ഗൗരവതരമാണ്......ആദ്യമായാണ് ഇത് ചെയ്യുന്നത് എന്നതൊന്നും ഒരു ക്ഷമാപണത്തിന് സാധ്യത തെളിയിക്കുന്നില്ല......പദ്ധതികളും നടത്തിപ്പും ഫൂള്‍പ്രൂഫാരിക്കണമെന്നു സാരം....നിക്കറിന്റെ വലതു പോക്കറ്റില്‍ സംഗതിയുണ്ട്......ഇന്ദ്രനീലിമയോലുന്ന രണ്ടു വലിയ തുരിശു പരലുകള്‍.

നഞ്ചിടല്‍ എന്ന ഇതിഹാസത്തിന്റെ പുനരാവിഷ്കരണമാണ് ഉദ്ദേശ്യമെന്ന് മനസ്സിലായിക്കാണുമല്ലോ!

ആകാംക്ഷ ഓരോ അണുവിലും അങ്ങിനെ ത്രസിക്കുകയാണ്.മത്സ്യസമ്പത്ത് വാരിക്കൂട്ടുന്ന പകല്‍ക്കിനാവും ഇടക്കിടെ മിന്നി മായുന്നുണ്ട്.നടപ്പിനും ഓട്ടത്തിനുമിടയിലുള്ള ഒരു തലത്തിലൂടെ ചില കാലുകള്‍ തോട്ടിലേയ്ക്ക്..

"ഈ വല്യ കയത്തീ കലക്കിയാല്‍ മീഞ്ചാകുവേലാരിക്കും"

ശരിയാണല്ലോ.കയത്തിലെ വെള്ളത്തിന് രണ്ടു തുരിശുപരല്‍ കുറവായിരിക്കും.ആദ്യ പ്രതിസന്ധി.ആലോചിക്കാം.കൂട്ടായി ആലോചിച്ചാല്‍ ചുരുളഴിക്കാനാവാത്ത സമസ്യകളുണ്ടോ?മേല്‍പ്പറഞ്ഞത് സാധൂകരിക്കാനെന്നവണ്ണം ആരെങ്കിലുമൊക്കെ പ്രകൃതിയുടെ വിളി വന്നെങ്കില്‍ മാത്രം പോകാന്‍ സാധ്യത ഉള്ള
തോടിന്റെ അതിര്‍വരമ്പിനുള്ളില്‍ തന്നെ വളര്‍ന്നു നില്‍ക്കുന്ന ഒരു വലിയ ചേര് മരത്തിന്റെ ചുവട് ഞങ്ങളുടെ ശ്രദ്ധയില്‍പ്പെട്ടു.ഗംഭീരം...ആത്മാഭിമാനം അലയടിച്ച നിമിഷങ്ങള്‍....

രണ്ടു മൂന്നു വലിയ വേരുകളും കുറേ അസിസ്റ്റന്റ് വേരുകളും അതിര്‍ത്തി പാകിയ ഏകദേശം മൂന്നര ലിറ്റര്‍  വെള്ളവും കൊതുകിന്റെ കൂത്താടിയേക്കാളും വലിപ്പമുള്ള രണ്ട് മത്സ്യകന്യകള്‍ നീരാടുന്ന ജലാശയത്തിനുള്ളിലെ ജലാശയം ഇതാ ഞങ്ങള്‍ക്കു മുന്നില്‍.ഇനി വൈകിക്കൂടാ...നെറ്റിയില്‍ വെയിലടിക്കുമ്പോള്‍ തിളങ്ങുന്ന പൊട്ടുളള ടി മത്സ്യങ്ങള്‍ പീഡിപ്പിക്കാന്‍ ചെന്നവനെ കൂസലില്ലാതെ നോക്കി നിര്‍വീര്യമാക്കുന്ന പെണ്‍കൊടികളേപ്പോലെ അങ്ങിനെ നിശ്ചലരായി ജലോപരിതലത്തില്‍ നില്‍ക്കയാണ്.'ആഹാ..അഹങ്കാരികളേ..മരിപ്പാനൊരുങ്ങിക്കൊള്‍വിന്‍.'

തുരിശുപരലുകള്‍ കീറത്തോര്‍ത്തില്‍ കെട്ടി കിഴിയാക്കി വെള്ളത്തിലാഴ്ത്തി കലക്കാന്‍ തുടങ്ങി.സമയം കടന്നുപോകുന്നു.വെയിലിന് ചൂടേറുന്നു.മത്സ്യസമ്പത്തിന് മാത്രം ഒരു കൂസലുമില്ല.വിശപ്പുണ്ട്...വീടുകളില്‍ അന്വേഷിക്കും...പ്രതിസന്ധികളുടെ ഘോഷയാത്ര.ആലോചിച്ചു.മാര്‍ഗ്ഗം തെളിഞ്ഞു.കീറത്തോര്‍ത്തിന്റെ ബാക്കികൊണ്ട് മത്സ്യകന്യകളെ പിടിച്ച് തുരിശു കിഴിയിലിട്ട് നഞ്ച് പദ്ധതി വിജയിപ്പിക്കാന്‍ തീരുമാനമായി.മാതൃകാപരമായും അല്‍പ്പസ്വല്‍പ്പം പ്രതീകാത്മകമായും അതും നിര്‍വ്വഹിക്കപ്പെട്ടു.ചേരു വേരുകളില്‍ തിളങ്ങുന്ന രണ്ടു വരകള്‍ പോലെ മത്സ്യസമ്പത്ത് ഉപേക്ഷിച്ച് വീടുകളിലേക്കോടി.ചീരത്തോരനും കൂട്ടി പള്ള നിറയേ ചോറുണ്ടു.ക്ഷീണാധിക്യത്താല്‍ ഉച്ചയുറക്കത്തിനുള്ള 'ഇനീം വെയിലത്തെറങ്ങാതെ കൊറച്ച് കെടക്കടാ'ആഹ്വാനം ശിരസ്സാ വഹിച്ചു.നീലത്തടാകത്തില്‍ ചുവന്ന നഞ്ച് കലക്കുന്ന സ്വപ്നമൊക്കെ പൊടുന്നനേ ഉറക്കത്തിലേയ്ക്ക് കടന്നു വന്നു.

എന്തൊക്കെയോ ബഹളം കേട്ടു കണ്ണു തുറന്നു..ചാടി ശബ്ദം കേട്ട ഭാഗത്തെ ലക്ഷ്യമാക്കി നീങ്ങി.പലചരക്കുകടയില്‍ സാധനം വാങ്ങാന്‍ പോയ അങ്കിളു വന്നിട്ടുണ്ട്.പഴമ - പുതുമ വില - ഗുണ നിലവാര - താരതമ്യ വശ്ശാലുളവായ ശബ്ദവീചികളാണ് നമ്മെ ഉണര്‍ത്തിയത്.അതേതായാലും നന്നായി.എന്തു തന്നെ ആയാലും പുതിയ സംഗതികള്‍ വീട്ടിലേയ്ക്ക് വാങ്ങിക്കൊണ്ടു വരുമ്പോള്‍ അതിനിടയില്‍ വിരകാന്‍ നമുക്കിഷ്ടമാണ്."ഇന്നാടാ ഒരു വെല്ലക്കഷ്ണം'വെല്ലം എന്ന വെളുത്ത ആണിശര്‍ക്കര പൊതിഞ്ഞുകൊണ്ടുവന്ന കടലാസു കുമ്പിളിന്റെ മൂട്ടിലുള്ള രഹസ്യ അറ തുറന്നപ്പോള്‍ വെറുതേ കിട്ടിയതാവും എന്നു ധ്വനിപ്പിക്കുംപോലെ നമുക്കു നല്‍കപ്പെട്ടു.കിട്ടിയപാടേ രണ്ട് നെടുങ്കന്‍ നക്കുകളാല്‍ നീറ്റാക്കി പോക്കറ്റിലും നിക്ഷേപിച്ചു.വിഭവങ്ങളുടെ ഉപഭോഗം കരുതലോടെ മാത്രം..ഇടവേളകളിട്ടുള്ള അടുത്ത നക്കുകളില്‍ തീഷ്ണമായ തുരുമ്പ് ചുവ ഉണ്ടായിരുന്നുവെന്നത് പരിഗണനീയമായ വിഷയമായിരുന്നിട്ട് കൂടി......നഞ്ച് കലങ്ങി..അടുത്ത ദിവസം മുഴുവനും.

PS:നഞ്ചു കലക്കല്‍ എന്നത് വളരെ പ്രാകൃതമായ ഒരു മത്സ്യബന്ധനമാര്‍ഗ്ഗമാണ്.ഒരുപാട് ജീവനുകള്‍ പാഴായി പോകുന്ന സംഗതിയാണ്.

ബാല്യം മുതല്‍ എഴുത്തു വരെ(പതിവുപോലെ)

1.ബാല്യം:-

ഓരോ ബാല്യവും-ആശയങ്ങളിലടക്കം-അല്‍പ്പം വഞ്ചനാപരമാണ്.ബാല്യത്തിലെനിക്ക് നേരിട്ട് അടിച്ചമര്‍ത്താത്ത,പരിഗണനയും മിഠായിയും തരുന്ന എല്ലാ മാമന്‍മാരേയും ഇഷ്ടമായിരുന്നു.മുതിര്‍ന്നപ്പോള്‍ പല മാമന്‍മാരുടേയും ജോലിയും കൂലിയും വസ്ത്രധാരണരീതിയും രാഷ്ട്രീയവും ജനസമ്മിതിയുമൊക്കെ എനിക്ക് പ്രശ്നമായിത്തുടങ്ങി.മിഠായി സ്വീകരിക്കുന്നതിന് കൂടുതല്‍ സങ്കീര്‍ണ്ണമായ മാനദണ്ഡങ്ങള്‍.ചുരുക്കിപ്പറഞ്ഞാല്‍ ഇംഗ്ളീഷുകാരന്റെ ഡേറ്റിങ്ങ് പീരിഡ് സ്പെഷ്യല്‍ പ്രണയംപോലെ.

2.ആദര്‍ശം:-

ആദര്‍ശങ്ങള്‍ സ്മൃതികളെ ഞാനെങ്ങിനെ പരിഗണിക്കുന്നു എന്നതിന്റെ അളവുകോലല്ലേ?അനീതി രുചിച്ചതിന്റെ സ്മരണകള്‍ ലോകത്തിനു മുഴുവനും ഏറ്റക്കുറച്ചിലുകളോടെ ഉണ്ടാവുമല്ലോ.ദൗര്‍ബല്യം ചൂഷണത്തിന് വഴിവെച്ചിട്ടുണ്ടെങ്കില്‍ രണ്ടു രീതിയില്‍ ചിന്തിക്കാം-ബലശാലിയായി വളര്‍ന്നു മെച്ചപ്പെട്ട ഒരു ചൂഷകനാവാം;ബലവാനായി വളര്‍ന്നാലും ദുര്‍ബലനായി തുടര്‍ന്നാലും ചൂഷണത്തെ കര്‍മ്മംകൊണ്ട് എതിര്‍ക്കുകയുമാവാം.

3.വിവേചനം:-

വിവേചനങ്ങളുടെ വേരുകള്‍ എവിടെയൊക്കെ പാഞ്ഞിട്ടുണ്ടെന്ന് ആര്‍ക്കും പൂര്‍ണ്ണമായി അക്കമിട്ടു പറയാനാവില്ലെന്ന് തോന്നി.ഭാഷയുടെ അടിസ്ഥാനത്തില്‍ ഒരുമിച്ചു കൂടിയവര്‍ പ്രാദേശികഭേദത്തിന്റെ(സ്ളാങ്ങുകളുടെ)പേരില്‍ ഒളിഞ്ഞും തെളിഞ്ഞും ഏറ്റുമുട്ടുന്നുണ്ട്;പുച്ഛിക്കുന്നുണ്ട്.ഭാഷയുടെ ആത്യന്തികലക്ഷ്യം ആശയവിനിമയമെന്നിരിക്കെ,എത്ര വ്യാകരണനിബന്ധമായി സംസാരിക്കാനറിഞ്ഞാലും മനസ്സിലുള്ളത് കേള്‍വിക്കാരനിലെത്തിക്കാനായില്ലെങ്കില്‍ അത് ഒരു പരാജയം ആണെന്ന് സമ്മതിക്കാന്‍ എനിക്കും മടിയാണ്.

4.എഴുത്ത്:-

എഴുത്തിന് പെട്ടെന്ന് ഓര്‍ക്കാവുന്ന ചില കാരണങ്ങള്‍/ഗുണങ്ങള്‍/ദോഷങ്ങള്‍ ഉണ്ട്.

മനുഷ്യന്റെ പ്രകടമായ ഓര്‍മ്മശക്തിക്ക് പല ദുര്‍വ്യാഖ്യാന സ്വഭാവങ്ങളുമുള്ളതുകൊണ്ട് എഴുത്ത് പ്രത്യക്ഷദുര്‍വ്യാഖ്യാന;സാരാംശം ചോര്‍ന്നുപോവല്‍ സംഗതികളില്‍ നിന്ന് മുക്തമാണ്.സ്വയം പരിഷ്കരിക്കലുകള്‍ക്കും വിചിന്തനങ്ങള്‍ക്കും വഴിവെക്കാറുണ്ട് എഴുത്ത്.

ശരീരസാന്നിദ്ധ്യം ദുര്‍ബലമായിട്ടുള്ളവരും ആശയവിനിമയത്തിനിടയിലെ സ്വഭാവിക ഡിസ്ട്രാക്ഷനുകളെ ഇഷ്ടപ്പെടാത്തവരും എഴുത്തിലേയ്ക്ക് ആകൃഷ്ടരായേക്കാം.ഏതു റോക്കറ്റ് വിക്ഷേപണപ്രക്രിയക്കിടയിലും കപ്പപ്പുഴുക്ക് റെഡിയായിട്ടുണ്ട് ലെവല്‍ ഡിസ്ട്രാക്ഷനുണ്ടാക്കാനും അതിനെ ഏറ്റുപിടിക്കാനും ആളുണ്ടാവും.അങ്ങിനെ നോക്കിയാല്‍ എഴുത്ത് ഒരു ജോലി സംസ്കാരവുമാണ്(വര്‍ക്ക് കള്‍ച്ചറെന്നതിന്റെ സ്വതന്ത്രപരിഭാഷ)

മണങ്ങള്‍

മണങ്ങളെപ്പറ്റി ഏറെസമയം ചിന്തിക്കുന്നവര്‍ അങ്ങിനെയാണ്,ഇങ്ങിനെയാണ് എന്നൊന്നും പറയാനറിയില്ല.

എന്തായാലും മണങ്ങളെ വളരെ ഗൗരവത്തോടെ കണക്കിലെടുത്തിരുന്നു.

വെളുത്ത ചെളി(?)യുള്ള നഖം കടിക്കുമ്പോള്‍ ഒരു പാല്‍മണം അനുഭവപ്പെടാറുണ്ടായിരുന്നു.നഖംകടിക്കുന്ന കാലത്ത് അത് ഇഷ്ടവുമായിരുന്നു.പിന്നീട് നോം നഖംകടി നിര്‍ത്തിയതില്‍ പിന്നെയാണ് അത് മനഃശാസ്ത്രപരമായ അരക്ഷിതാവസ്ഥ(ഇന്‍സെക്യൂരിറ്റി)യുടെ ലക്ഷണമായി മാറിയതെന്ന് പ്രത്യേകം പറയേണ്ടതില്ലല്ലോ.

മുല്ലയും ഗന്ധരാജനും കല്ല്യാണസൗഗന്ധികവും ചെറുകുപ്പികളില്‍ വെള്ളത്തിലിട്ടുവെച്ചാല്‍ സുഗന്ധം പടരുമെന്ന് ആരോ മുതിര്‍ന്നവര്‍ പറഞ്ഞ്,പരീക്ഷിച്ച് പഠിച്ചുവെച്ചു.കാപ്പിപ്പൂവിന്റെ മണം കാത്തിരുന്നു സീസണല്‍ ആയി മാത്രം നുകരാനാവുന്ന ഒന്നാണ്.പാലപ്പൂ മണത്താല്‍ ബോധം കെടുമെന്നല്ലാതെ യക്ഷി വരുമെന്ന് അധികമാരും പറഞ്ഞില്ല.ബോധമില്ലാത്ത നീ ബോധംകെടുമെന്ന് പേടിക്കേണ്ടന്നും അനുഭാവത്തോടെ പറഞ്ഞവരുണ്ട്.

പുതുമഴയിലുണരുന്ന പൊടിമണ്ണിന്റെ മണം ഒരു ലഹരിയാണ്.

കശുവണ്ടി ചുടുന്നതിന്റേയും കുരുമുളകു പുരട്ടി പച്ചത്തവള വറക്കുന്നതിന്റേയും കോഴിക്കോടന്‍ ബിരിയാണിയുടേയും കുറുമയുടേയും
മണം മൃതസഞ്ജീവിനി പോലെ മരിച്ചവനെ ചാടിയെണീപ്പിക്കാന്‍ കെല്‍പ്പുള്ളതാണ്.

മണങ്ങളുടെ ജീവശാസ്ത്രം പഠിപ്പിച്ചപ്പോള്‍ കാര്യങ്ങളാകെ തകിടം മറിഞ്ഞു.പദാര്‍ത്ഥകണികകള്‍ നാസാരന്ധ്രങ്ങളിലെ നാഡീ സന്ദേശ സ്വീകരണകേന്ദ്രങ്ങളെ ഉദ്ദീപിപ്പിച്ച്,ഉദ്ദീപനത്തെ തരംഗങ്ങളും ന്യൂറോട്രാന്‍സ്മിറ്ററുകളുംവഴി  തലച്ചോറിലെ വിശകലന വിഭാഗത്തിലെത്തിച്ചാണത്രേ നമ്മള്‍ മണമറിയുന്നത്.

അയ്യേ!!കേട്ടതും പതിവുപോലെ വൃത്തികെട്ട മണങ്ങളെപ്പറ്റി ഓര്‍ത്തുപോയി.ഇനിമുതല്‍ ശ്വാസം പിടിച്ചുവെക്കണം.
അതുപോലെ ഹോട്ടലിന്റെ അടുത്തെത്തിയാല്‍ ഏറ്റവും വിലകൂടിയ കറിയുടെ മണം പരമാവധി വലിച്ച് അകത്താക്കണം.മുന്തിയ ഹോട്ടലുകളില്‍ സ്വര്‍ണ്ണവിലയുള്ള ലോബ്സ്റ്റര്‍ പോലെയുള്ള  സമുദ്രവിഭവങ്ങളൊക്കെ ഉണ്ടാവും.

വിലയുള്ള കറിയുടെ സൗജന്യ പദാര്‍ത്ഥകണികകള്‍ പോരട്ടെ...

തുടക്കത്തിന്റെ ഒടുക്കം

Then Jesus said to the crowds and to his disciples, “The teachers of religious law and the Pharisees are the official interpreters of the law of Moses.So practice and obey whatever they tell you, but don’t follow their example. For they don’t practice what they teach.They crush people with unbearable religious demands and never lift a finger to ease the burden.

“Everything they do is for show. On their arms they wear extra wide prayer boxes with Scripture verses inside, and they wear robes with extra long tassels.And they love to sit at the head table at banquets and in the seats of honor in the synagogues. They love to receive respectful greetings as they walk in the marketplaces, and to be called ‘Rabbi.’

ഇത് നസറായനായ യേശുകൃസ്തുവിന്റെ പൊതുജീവിതത്തില്‍ സഹയാത്രികനായ ഒരു മനുഷ്യനെഴുതിയതാണ് എന്നു ചരിത്രരേഖകളും പറയുന്നു.പിന്നീട് യേശുകൃസ്തുവിന്റെ ജീവിതമെന്ന സന്ദേശത്തിന് മജ്ജയും മാംസവും വന്ന് അത് സഭ ആയപ്പോള്‍,പ്രമാണിത്തം ഉള്ളവര്‍-ദേശഭേദമന്യേ-തിരഞ്ഞെടുത്തത് നീളന്‍ കുപ്പായങ്ങളാണ്.കുപ്പായക്കാര്യമൊഴിച്ച് മറ്റുള്ളതെല്ലാം ഒരു നാമധേയത്തില്‍ ഒന്നിച്ചുകൂടുന്നവര്‍ മനസ്സിനുള്ളില്‍ ചര്‍ച്ച ചെയ്യേണ്ടുന്ന കാര്യങ്ങളാണ്.മതപ്രമാണിത്വത്തിന്റെ യാതൊരു തലത്തിലുമുള്ള വിശകലനങ്ങളിലേക്കും കടക്കാന്‍ ഇഷ്ടപ്പെടുന്നില്ല.

പറഞ്ഞുവന്നത് മറ്റൊന്നാണ്.ഒരു സമൂഹത്തില്‍,സംരഭകത്വം മനസ്സിലും ചിന്താഗതികളിലുമുള്ള ആരും തങ്ങള്‍ക്ക് ചെയ്യാനാവാത്ത (കാരണം എന്തുമാവാം);പൊതുജനശ്രദ്ധ പിടിച്ചുപറ്റുന്ന കാര്യങ്ങള്‍ ചെയ്യുന്നവരെ സമീപിക്കും.നടീനടന്‍മാര്‍,ഗായകര്‍,കായികതാരങ്ങള്‍,എഴുത്തുകാര്‍ എന്നിങ്ങനെ ബ്രാന്റ് ചെയ്യപ്പെടുത്താനാവുന്ന സകലരേയും.അവരെ തങ്ങളുടെ സ്വാധീനത്തിന്റെ അടയാളമായ എന്തെങ്കിലും ധരിക്കാനും പ്രദര്‍ശിപ്പിക്കാനും പ്രേരിപ്പിക്കും.ലോകചരിത്രത്തില്‍ ഇന്നോളം ഇത്തരം വിരുദ്ധ-സ്വാര്‍ത്ഥ താത്പര്യങ്ങള്‍ കടന്നുകയറാതെ രക്ഷപെട്ട ഏതെങ്കിലും പ്രസ്ഥാനമോ സംഘടനയോ ഉണ്ടായിട്ടുണ്ടോ എന്നറിയില്ല!മെരുക്കല്‍/ദുര്‍വ്യാഖ്യാന പ്രക്രിയകള്‍ക്കും മനോഭാവത്തിനും പിറകിലെന്താണുള്ളത്?പരിഭാഷകന്‍ സ്വന്തം ആശയങ്ങള്‍ പ്രഭാഷകന്റെ വേദി പങ്കിട്ട് പറയുംപോലാവുകയില്ലേ?

എല്ലാ ഇനീഷ്യേറ്റീവുകളിലും ആക്ഷേപഹാസ്യത്തിനുള്ള വഴിമരുന്ന് വീഴുകയെന്നത് ഒഴിവാക്കാനാവാത്ത എന്തോ ഒരു സംഗതിയാവും.

ചുവന്ന കാഴ്ചകള്‍

"എന്തിനാണ് മാഷേ ഈ രക്തച്ചൊരിച്ചിലുകളും നരബലിയുമൊക്കെ?"പലരുകൂടുന്ന നാട്ടുക്കൂട്ടമൊരിക്കലിത്തിരി ഗൗരവത്തിലായി.

രക്തം ചൊരിയാറുള്ളവരൊക്കെ വല്ലാത്തൊരു മൗനത്തിലേക്കു പതുങ്ങി.

"ഒരുപാടു ചിന്തിച്ചിട്ടുള്ള വിഷയമാണ്...

നമ്മുടെ ചോരയ്ക്ക് ചുവപ്പാണല്ലോ നിറം...

തരംഗദൈര്‍ഘ്യം അഥവാ വേവ്ലെങ്ങ്ത് കൂടിയ ചുവന്ന നിറരശ്മികള്‍ സഞ്ചാരപഥത്തിലെ തടസ്സങ്ങളെല്ലാം ചാടിക്കടന്ന്  ഏറ്റവും പെട്ടെന്ന് കണ്ണിലും തലച്ചോറിലുമെത്തിച്ചേരുന്നവയാണെന്ന് കേട്ടിട്ടില്ലേ?

വഴിയരികിലെ ചുവന്ന അപായചിഹ്നങ്ങള്‍ ശകടങ്ങളില്‍ പാഞ്ഞുപോകുന്ന,കാഴ്ചകള്‍ താരതമ്യേന അപൂര്‍ണ്ണമായവരെ ഉദ്ദേശിച്ചുള്ളവയാണ്.തങ്ങളെപ്പോലെ കാഴ്ചക്കുറവുള്ളവരായിരിക്കാം പ്രീതിപ്പെടുത്താനുദ്ദേശിക്കുന്ന ദേവകളുമെന്ന് പുരോഹിതന്‍ കരുതുന്നുണ്ടാവും.

രണ്ടാമതായി,
മുറിവില്ലാത്ത,ചോര പുറത്തു കാണാത്ത വേദനയ്ക്ക് സ്നേഹമുള്ള സ്വന്തം വീടുപോലൊരിടത്ത് പരിചരണം കിട്ടും.വേദനയില്ലെങ്കിലും മുറിവും രക്തവുമുണ്ടെങ്കിലേ അന്യരുടെ പരിഗണന കിട്ടാനിടയുള്ളൂ.രക്തം കണ്ടാല്‍ മാത്രം ജോലി ചെയ്തെന്നു വരുത്തുന്ന അന്യരേപ്പോലെയാവാം നമ്മുടെ ഭരണവര്‍ഗ്ഗത്തിലെത്തിപ്പെടുന്നവരുള്ളത്."

ഏറെ ദിനരാത്രങ്ങള്‍കഴിയുംമുന്‍പേ,മാഷിന്റെ ചുവപ്പെല്ലാം ഈച്ചകള്‍ ആഹാരമാക്കിയതിനാല്‍ ആരുടെയെങ്കിലുമൊക്കെ
കണ്ണിലോ പരിഗണനയിലോ എത്തിയോ എന്നറിയില്ല.

ശീഘ്രം ജായിയേ

അനിശ്ചിതത്വത്തിലൂടെ,അനിശ്ചിതത്വത്തിലേയ്ക്കുള്ള ഒരു വിമാനയാത്രക്കൊരുങ്ങുകയാണ്.പ്രായോഗികതയും ആദര്‍ശവും സ്നേഹവും സഹതാപവും സൗഹൃദവും നിസ്സഹായതയും ദുരഭിമാനവും ജനക്കൂട്ടസ്വഭാവവുമൊക്കെ മഴയായി പെയ്ത ചില മാസങ്ങള്‍ക്കുശേഷം നാട്ടിലേയ്ക്ക്....മേല്‍പ്പറഞ്ഞതൊന്നും ഏകപക്ഷീയമല്ല.ചോദിച്ചപ്പോള്‍ പടിപടിയായി പുറത്തുവന്നതാണ്.

വാടക തലച്ചോറുള്ള പുലിയായി രാവിലെ ചീറിനിന്ന പി.ആര്‍.ഒ. വീട്ടിലെ പ്രാരാബ്ധം പറഞ്ഞ് പാര്‍ക്കിങ്ങിലെ മെഷീനിലിടാനെങ്കിലുമുള്ള ചില്ലറപ്പൈസ ചോദിച്ച വൈകുന്നേരം.

വിസ അസാധുവാക്കല്‍ പ്രക്രിയയ്ക്ക് ശേഷം അകത്തെത്തി.സമയമൊരുപാടുണ്ട്.ഡ്യൂട്ടി ഫ്രീ ഷോപ്പൊക്കെ നടന്നു കണ്ട്, ഫോട്ടോകളൊക്കെയെടുത്ത് ടിക്കറ്റില്‍ പറഞ്ഞ ഗേറ്റിലെത്തി;ക്യൂ വില്‍ നിന്നു.തിരക്കുള്ള സമയമാണ്.നീണ്ട ക്യൂ.കുട്ടികളും പ്രായമായവരും രോഗികളും സമയത്ത് ഉറങ്ങുന്നവരും ക്ഷീണിക്കാനും അസ്വസ്ഥരാകാനും തുടങ്ങുന്ന രാത്രിസമയം.

"ഹേയ്,യുവര്‍ ബാഗ് ഈസ് ഓപണ്‍"തിരിഞ്ഞുനോക്കി.

ശരിയാണ്.തോള്‍സഞ്ചിയുടെ മുകളിലെ അറ സിബ് കേടായി തുറന്നു കിടക്കുകയാണ്.

"ഓഹ്,താങ്ക്യൂ"നന്ദി പറഞ്ഞു.

കണ്ടാല്‍ ധനികരെന്നു തോന്നിക്കുന്ന ഒരു കുടുംബത്തിലെ ചെറുപ്പക്കാരനാണ് ഇപ്പോളീ
നന്ദിക്ക് അര്‍ഹനായിരിക്കുന്നത്. കാഴ്ചയില്‍ തീരെ പകിട്ടില്ലാത്ത ഈയുള്ളവനോട് സംസാരിക്കാനുള്ള സൗമനസ്യം കാട്ടിയല്ലോ!

പളപളപ്പില്ലാത്തതിനോട് ദുര്‍മുഖം കാട്ടുന്നവരെ മനസ്സിലെങ്കിലും പുച്ഛിക്കാന്‍ മനഃപൂര്‍വ്വം വള്ളിച്ചെരുപ്പിടുന്ന ചില സമയങ്ങളുമുണ്ടെന്ന് സമ്മതിക്കാതിരിക്കാനാവില്ല.

സിബ്ബിന്റെ കാര്യത്തില്‍ തത്കാലം ഒന്നും ചെയ്യാനില്ല.ശൂന്യമായ ആ അറ തുറന്നു കിടക്കുന്നതില്‍ പ്രശ്നവുമില്ല.

"അണ്ണാ,ഉങ്കള്‍ തമിഴാ?"ഒച്ചിഴയുന്നതുപോലെയുള്ള ആ വലിയ ക്യൂവില്‍ മുന്‍പില്‍ നിന്ന ആളാണ് മെല്ലെ തിരിഞ്ഞ് ചോദിച്ചത്.ഒരു പത്താംക്ളാസ്സുകാരിയുടെ മുഖഛായയുള്ള നാണംകുണുങ്ങിയെന്ന് ആര്‍ക്കും വായിച്ചെടുക്കാവുന്ന ഒരു പെണ്‍കുട്ടിയാണ്.സിനിമകളിലെപ്പോലെയുള്ള അതിഭവ്യതയിലാണ് സംസാരം.

"അല്ല.തമിഴല്ല.തെരിയും.പേശറ്ത്ക്ക് മട്ടും കൊഞ്ചം ഡിഫിക്കല്‍റ്റിയിറിക്ക്.ഏനായിത്തു?അല്ലല്ല എന്ന വിഷയം?"പ്രയോഗിച്ച് ശീലമില്ലാത്തതിനാല്‍ അവിയലോ സാമ്പാറോ ഒക്കെ ആയാണ് സെന്തമിള്‍ ഒഴുകുന്നത്.

ഹാന്റ്ബാഗില്ലാത്ത അമ്മച്ചിമാര്‍ തൂവാലത്തുണിക്കുളളില്‍ പത്തുരൂപ ചുരുട്ടുംപോലെ ചുരുട്ടപ്പെട്ട ഒരു കടലാസെടുത്ത് നിവര്‍ത്തി അവരെന്റെ കൈയ്യില്‍ തന്നു.ബോര്‍ഡിങ്ങ് പാസാണ്.

"ഇതെ കൊഞ്ചം പടിച്ച് പാരുങ്കെ'എന്നോ മറ്റോ മൃദുവായി പറഞ്ഞു.പാരിയ എന്റെ ചങ്കിടിച്ചു.ശ്രീലങ്കയ്ക്ക് പോവേണ്ട ആളാണ് കൊച്ചിന്‍ ക്യൂവില്‍ നില്‍ക്കുന്നത്.വിമാനം പറന്നു പൊങ്ങാന്‍ പത്തു മിനിറ്റുകൂടി.

"അയ്യോ!ഇത് തപ്പാന ക്യൂവ്.റൊമ്പ ലേറ്റ്"എന്നു അവരോടും "ഷീ ഈസ് ഇന്‍ ദ റോങ്ങ് ക്യൂ മാം.ഷീ ഹാസ് ഗോട്ട് എ ലിറ്റില്‍
ലാങ്ങ്വേജ് പ്രോബ്ളം ഇറ്റ് സീംസ.ഹെര്‍ ഫ്ളൈറ്റ് വില്‍ ലീവ് ഇന്‍ ടെന്‍ മിനിറ്റ്സ്.കാന്‍ യു പ്ളീസ് ഡു സംതിങ്ങ്?താങ്ക്യൂ"എന്ന് തിരക്കിട്ട് ജോലി ചെയ്യുന്ന ഗൗരവക്കാരി ഗ്രൗണ്ട് സ്റ്റാഫിനോടും പറഞ്ഞു.എത്തിവലിഞ്ഞ് ശ്രീലങ്കന്‍ ബോര്‍ഡിങ്ങ് പാസ് ഓഫീസര്‍ക്കു കൈമാറി.

നാടിന്റെ പ്രത്യേകത കൊണ്ടാവാം പറഞ്ഞവന്റെയും പോകേണ്ടവളുടേയും പത്രാസു നോക്കാതെ ബോര്‍ഡിങ്ങ് പാസൊന്നു ഓടിച്ചുനോക്കി
അവര്‍ നേരിട്ട് തമിഴ് കുട്ടിയെ അവളുടെ ശരിയായ ഡിപ്പാര്‍ച്ചര്‍ ഗേറ്റിലേക്ക് സ്പെഷ്യല്‍ റെക്കമെന്റേഷനോടെ കയറ്റി വിടുന്നതിനായി ഇറങ്ങി.

"റൊമ്പ താങ്ക്സങ്കെ"കുട്ടി വട്ടംതിരിഞ്ഞ് ഭവ്യത വാരി വിതറുകയാണ്.

"പറവായില്ലൈ.ശീഘ്രം ജായിയേ"തിരക്കില്‍ ആ ജായിയേ അങ്ങ് അലിഞ്ഞു പോയി.

ഗ്രൗണ്ട് സ്റ്റാഫ് ഒരു സുഹൃത്തിനെ അവരുടെ ജോലിക്കായി വാക്കി ടോക്കിയിലൂടെ വിളിച്ച് വരുത്തിയിരുന്നു.തമിഴ്കുട്ടിക്ക് നാട്ടിലേക്കുള്ള വിമാനം കിട്ടിയെന്നു തന്നെ കരുതാം.വിമാനം മിസ്സാവുന്നത് എത്ര കഴിവും സമ്പത്തും ഉള്ളവനും ബുദ്ധിമുട്ടുതന്നെയാണ്.

സീറ്റിലെത്തും വരെ അവളെക്കുറിച്ച് അവളുടെ സാഹചര്യത്തെക്കുറിച്ചും അറിയാതെ ആലോചിച്ചു പോയി.സാധാരണഗതിയില്‍ ശബ്ദം പൊങ്ങാത്ത താനെങ്ങിനെ ഇതൊക്കെ പറഞ്ഞൊപ്പിച്ചു!ബാഗിന്റെ സിബ് തുറന്നു കിടക്കുകയാണെന്ന് അനുഭാവപൂര്‍വ്വം കാട്ടിത്തന്ന ചെറുപ്പക്കാരന്‍  കാട്ടിത്തന്ന നല്ല മാതൃക തന്നെയാണ് ഇപ്പോളിതൊക്കെ കുറേക്കൂടി ഫലപ്രദമായി ചെയ്യാന്‍ പ്രചോദനമായത്.എല്ലാ ലോകമഹായുദ്ധങ്ങള്‍ക്കും കാരണങ്ങളും പെട്ടെന്നുണ്ടായ കാരണങ്ങളുമുണ്ടാവുമല്ലോ!തീര്‍ച്ചയായും ചെറിയ നല്ല പ്രവൃത്തികള്‍ക്ക് നമ്മളുദ്ദേശിക്കുന്നതിലുമപ്പുറം ഫലങ്ങളുണ്ടാവുമല്ലേ?