കാണാതെപോയ അത്ഭുതങ്ങള്‍!

"സാറേ,ഇതിവിടെ ആണോ പറയേണ്ടതെന്നറിയില്ല."

"എന്താടോ?വെക്കം പറ"

"സാറേ,കുറേക്കാലമായി എന്റെ അത്ഭുതങ്ങള്‍ ഓരോന്നായി കാണാതെ പോവുകയാണ്.അതു പരാതിയാക്കണോ പരസ്യമാക്കണോ എന്നറിയാത്തതുകൊണ്ടാണ് നേരെ ഇങ്ങോട്ട് പോന്നത്"

"എന്തു കാണാനില്ലെന്ന്?അത്ഭുതങ്ങളോ!?തെളിച്ച് പറയെടോ!നൂറു കൂട്ടം പണിയുള്ളതാണ്!"

"എന്റെ സാറേ,അത്ഭുതം!അത്ഭുതമെന്ന് കേട്ടിട്ടില്ലേ!?"

"ഇതു കുരിശായല്ലോ!ഒരു ഉദാഹരണം പറയാമോ സാാര്"

"‍ഉദാഹരണം ചോദിച്ചാല്‍ എന്തോരം പറയാനുണ്ട്!നമ്മടെയൊക്കെ ചെറുപ്പത്തില് തീ കത്തിക്കാന്‍ തീപ്പെട്ടിയായിരുന്നു.തണുത്തുപോയാല്‍ പിന്നെ ഒരു രക്ഷേം ഇല്ല.അങ്ങനെയിരിക്കെ  ഗള്‍ഫുകാര് ലൈറ്ററു കൊണ്ടുവന്നു.അടപ്പു തുറന്നാല്‍ തീ വരുന്ന അത്ഭുതം.പിന്നെ ചൈനക്കാരതിനെ എല്ലായിടത്തുമാക്കി.എല്‍.ഇ.ഡി.ലൈറ്റുള്ളതടക്കം.ആദ്യമൊക്കെ അല്‍ഭുതം തന്നെയായിരുന്നു.പിന്നെ തുറന്നു നോക്കിയപ്പോ ഞെക്കുമ്പോളുരയുന്ന കല്ലുകളും തീപ്പൊരി തുപ്പുന്ന ബാറ്ററിയും ഗ്യാസ് അഴിച്ചുവിടുന്ന വാല്‍വുമൊക്കെ കണ്ടു.അങ്ങിനെ ആ അല്‍ഭുതം അങ്ങ് പോയി.ബലൂണ്‍ പൊട്ടുമ്പോള്‍ ശബ്ദം കേള്‍ക്കുന്നത് മര്‍ദ്ദവ്യത്യാസം കൊണ്ടാണെന്ന് പിന്നീട് പഠിച്ചു.അങ്ങിനെ അല്‍ഭുതങ്ങളോരോന്നായി മോഷ്ടിക്കപ്പെടുകയാണ്."

"എടോ,ഇതിനുള്ള സ്ഥലം ഇവിടെയല്ല.താനേതെങ്കിലും വല്യ ആശുപത്രിയില്‍ പോയി പറ. പോടോ!"

"സാറീ പറഞ്ഞതിലും അത്ഭുതമില്ല.സാറിതേ പറയൂ എന്ന മുന്‍വിധി പകരം വെച്ച് ആരോ ആ അത്ഭുതവും മോഷ്ടിച്ചിരിക്കുന്നു!!"

ഭോഗിയും ത്യാഗിയും

ആദ്യമാദ്യം പ്രകൃതിഭംഗിയേയും കൃത്യനിഷ്ഠയേയും ശാന്തതയേയും
ഏകാന്തതയേയും പിന്നെപ്പിന്നെ  ജനക്കൂട്ടത്തിന്റെ ആരാധനയേയുമൊക്കെ ഭോഗിക്കുന്നയാള്‍ ത്യാഗിയാണ്.ഏറിയ പങ്കും വേദനയും ബഹളവും ത്യാഗങ്ങളും പങ്കുവെക്കുന്നയാള്‍ ഭോഗിയാണ്.

ത്യാഗി,ഭോഗി സങ്കല്‍പ്പങ്ങള്‍ ഹൈന്ദവമാണെന്നു അര്‍ത്ഥമാക്കുന്നില്ല.ഭാഷാപരമായ എളുപ്പത്തിനുവേണ്ടി ഉപയോഗിച്ചു എന്നേ ഉള്ളൂ.എല്ലാ മതത്തിലും ത്യാഗികള്‍ എന്ന അപ്പര്‍ ക്ളാസ്സുണ്ടല്ലോ!ആദ്യകാലനേതാക്കളനുഭവിച്ച ബുദ്ധിമുട്ടുകളാവാം അവരുടെ ഈ സ്ഥിരം ത്യാഗിപട്ടത്തിനാധാരം.

വീണ്ടും,ജീവിതമെങ്ങിനെ മുന്നോട്ടുപോകുന്നു എന്നു ചോദിച്ചാല്‍ അത് വിജയങ്ങള്‍ അഥവാ
ഉത്തേജനങ്ങള്‍ അഥവാ ഭോഗങ്ങളിലൂടെയാണ്.മറ്റു വാക്കുകളില്‍ വിജയത്തെ,ഉത്തേജനത്തെ,ഭോഗത്തെ ഓരോരുത്തരും നിര്‍വജിക്കുംപോലെയാണ്.ചൊല്‍പ്പടിക്ക് ആളുകള്‍ നില്‍ക്കുന്നതും ദാസ്യവേലചെയ്യുന്നതും വിശ്വാസത്തെ പിന്തുണക്കുന്നതും മുഖസ്തുതി പറയിപ്പിക്കുന്നതും ലൈംഗികതയില്‍ പങ്കുചേരുന്നതും ലഹരിയില്‍ മുഴുകുന്നതുമൊക്കെയായി ഒരുപാട് ഭോഗങ്ങള്‍!ഏത് ഏതിനേക്കാള്‍ മികച്ചതാണെന്നറിയില്ല!!ഭോഗിയും ത്യാഗിയും ആരെന്നുമറിയില്ല!!
'അവനവനാത്മസുഖത്തിനാചരിക്കുന്നത് അപരന്നുസുഖത്തിനായി വരേണമെന്ന' ആശയം കേള്‍ക്കുമ്പോളൊരു ഉത്തേജനമുണ്ട്!

വന്നുപോയ ഒരു സാന്ത്വനം

"അതു പറഞ്ഞപ്പളാ ഓര്‍ത്തെ,നമ്മടെ വടക്കേകോട്ടമാലിലെ ചെക്കന്‍;ആ ബാഗ്ളൂര് പഠിച്ചോണ്ടിരുന്നോന്,‍ പുതിയ വീടൊണ്ടാക്കുന്നേന്റെ കക്കൂസു കുഴീല്‍ വീണ് പെടലി ഒടിഞ്ഞ് ഠിം എന്ന് മരിച്ചു.ഇക്കണ്ട സ്വത്തിന്റെ എല്ലാം ഏക അവകാശി!"

"അതെയോ!ശ്ശൊ!ഞാനിങ്ങനെ കേട്ടാരുന്നു.പക്ഷേ അച്ചായന്റെ കൂടെ ആശൂത്രീലായിപ്പോയതുകൊണ്ട് അടക്കിന് പോകാമ്പറ്റിയില്ല.തള്ളേം തന്തേം നല്ല കരച്ചിലാരുന്നോ?"

"പിന്നെ ആണോന്ന്!?ചങ്കത്തടിച്ച് കരയുവല്ലേ!കണ്ടാ സഹിക്കുകേല"

"അതു നേരാടീ.എന്റെ ഏറ്റോം മൂത്തത് ഒരു ആങ്ങളയൊണ്ടാരുന്നതിനെ നീ അറിയുമോ?ഒള്ളതില്‍ ഏറ്റവും സുന്ദരനാരുന്നെന്ന് അമ്മച്ചിയെപ്പോഴും പറയും.എല്ലാരോടും വല്യ സ്നേഹോമാരുന്നു.എനിക്ക് വല്യ ഓര്‍മ്മയില്ല.ആനിക്കാവള പറിക്കാന്‍ കേറീതാ.ഭീമന്‍ ആനിയല്ലേ!?കൈവിട്ട് താഴെ വീണു.താഴെയാണെങ്കില്‍ കാടു വെട്ടിയതിന്റെ കുറ്റികള്‍ കുന്തം പോലെ.ആശൂത്രീലേക്ക് പോകുന്ന വഴി ചോര വാര്‍ന്ന് മരിച്ചു.ചുരുങ്ങിയ സമയം കൊണ്ട് ഈ ലോകത്തിലെ മുഴുവന്‍ വേദനയും തിന്നു!"

"അതെയോ!മനുഷ്യന്റെ ഓരോ അവസ്ഥകളേ?ഓര്‍ക്കുമ്പോള്‍ ദേഹമാസകലം പൂത്തുകേറും.ഒരു മുള്ളു കേറുന്ന വേദന സഹിക്കാന്‍ പറ്റുന്നില്ല.ഒക്കെ ദൈവത്തിന്റെ ഓരോ പ്ളാനും പദ്ധതിയും പോലെ നടക്കട്ടെ.അല്ലെതെന്തു പറയാന്‍"

"വക്കഞ്ചേട്ടനെന്താ മിണ്ടാതെ കിടക്കുന്നത്?ക്ഷീണമാണോ?എന്നെ അറിയുകേലേ?"രോഗിയോട് കുശലമന്വേഷിക്കുന്ന ഘട്ടമെത്തി.നാട്ടിലെ ദുരന്തകഥകളും അതിന്റെ താത്വികമായ അവലോകനവും കഴിഞ്ഞല്ലോ!

"ഓ!അറിയും.എന്നാ മിണ്ടാന്‍?ഇപ്പോ കൊറവുണ്ട്"

"ചങ്കുവേദന പ്രശനമാണോ?ടെസ്റ്റു നടത്തിയിട്ട് അവരെന്നാ പറഞ്ഞു?"അതിനിടയില്‍ പെട്ടെന്ന് ഓര്‍ത്തപ്പോള്‍  ടെസ്റ്റുകളുടെ വിവരം ബൈസ്റ്റാന്ററോട് അന്വേഷിക്കാന്‍ തോന്നിയത് നന്നായി.രോഗത്തിന്റെ ശരിയായ വിവരങ്ങളറിയാതെ ആശ്വസിപ്പിക്കാനാവില്ലല്ലോ!

"അവര് കാര്യമായിട്ടൊന്നും പറഞ്ഞില്ല.ചങ്കുവേദന പണ്ടു മുതലേ ഇടക്കിടെ പറയാറുണ്ടാരുന്നു.ആശൂത്രീല്‍ പോകാന്‍ മടി.പാരമ്പര്യത്തില്‍ പ്രഷറും ഷുഗറും കൊളസ്ട്രോളുമൊക്കെയുണ്ടല്ലോ!"

"നേരാ!ഇപ്പോ ഇതൊക്കെ ഇല്ലാത്തോരാരുണ്ട്!?വക്കഞ്ചേട്ടന്‍ സന്തോഷമായിട്ടിരുന്നേ!ജീവിതമാകുമ്പോ ഇങ്ങനെ പലതും വരും പോകും"

"അതു നേരാണ്.ഇന്നിപ്പോ വന്ന് കഥ പറഞ്ഞു തുടങ്ങിയപ്പോള്‍ മുതല്‍ പോകുന്നതെപ്പളാന്ന് ആലോചിച്ചിരിക്കുകയായിരുന്നു"

ചെറിയ ഒരു ആശ്വാസം

അവിസ്മരണീയമായ ഒരു ഉത്ഥാനം(നവോത്ഥാനമല്ല)

പാന്റ്സുകളുടെ അരവണ്ണം മുപ്പത്തിരണ്ടില്‍ നിന്ന് ഇരുപത്തേഴായി നിന്ന കാലത്താണ്.പാന്റ്സുകള്‍ ചെറുതായതല്ല..അതിന്റെ ഉടമസ്ഥന്‍ മെലിഞ്ഞതാണ്.

മെലിഞ്ഞോന്‍ ജോലി ചെയ്യുന്ന ദൂരദേശത്തും പുതിയതാണ്.

തൊഴിലുടമയേയും കുടുംബത്തേയും നാട്ടില്‍ നിന്നേ അറിയാം.അരുമ മക്കളെ ട്യൂഷന്‍ പഠിപ്പിച്ചിട്ടുണ്ട്.ആകെ മൊത്തം തൊഴിലാളി മുതലാളി ബന്ധം മധുവിധു കാലത്തെന്നപോലെ കുശുമ്പും കുന്നായ്മയുമൊക്കെ പാടേ ഒളിപ്പിച്ച് സുന്ദരസുരഭിലമായിരിക്കുകയാണ്.

ടെക്നോ ഫ്രീക്കനായ മുതലാളി കുടുംബസമേതം തന്റെ ഓഫീസ് മുറിയിലിരുന്ന് ഇന്റര്‍കോമിലൂടെ പുതുമുഖമായ മെലിഞ്ഞോനെ വിളിപ്പിച്ചു.

മുപ്പത്തിരണ്ടു ഇഞ്ച് പാന്റ് ഇരുപത്തേഴിഞ്ച് അരയില്‍ ബെല്‍റ്റുകൊണ്ട് ഒന്നു കൂടി വരിഞ്ഞു മുറുക്കി മുഖത്താകെ പ്രസന്നതയും സേവനസന്നദ്ധതയും വാരി പുരട്ടി മെലിഞ്ഞോന്‍ മുതലാളി കുടുംബമിരുന്ന മുറിയുടെ വാതിലില്‍ മുട്ടി.

"വാ വാ"വിളികളെ ഫോളോ ചെയ്ത് കയറിയതും മുതലാളിയുടെ ഭാര്യയുടെ മുഖം വെള്ളിടികൊണ്ടപോലെ വിണ്ടുകീറി.അടങ്ങിയൊതുങ്ങി ഇരുന്ന മെലിഞ്ഞോന്റെ അരുമശിഷ്യകൂടിയായ പെണ്‍കുഞ്ഞിനോട് "മിണ്ടാതിരിയെടീ"എന്നും ആകസ്മികമായ ഒരു ക്ഷോഭധാരയില്‍ മുതലാളീപത്നി പറഞ്ഞു.അതിനുശേഷവും ആരും മുഖത്തു നോക്കുന്നില്ല.സംസാരത്തില്‍ വല്ലാത്ത ഔപചാരികത.പറയാനുള്ളതെല്ലാം പെട്ടെന്ന് പറഞ്ഞു അവസാനിപ്പിക്കുകയും ചെയ്തു.എന്തായാലും ആകെ വല്ലാത്ത പന്തികേട് ഫീലു ചെയ്തു.അത് മെലിഞ്ഞോനെ ചുറ്റിപ്പറ്റിയാണെന്നും മനസ്സിലാക്കി.

ഇറങ്ങിയ വഴിയേ റെസ്റ്റ് റൂമിലെ വലിയ നിര മുഖക്കണ്ണാടികളുടെ മുന്നിലേക്ക് പാഞ്ഞു.മറിഞ്ഞും തിരിഞ്ഞും നിന്ന് പരിശോധിക്കലാണ് ലക്ഷ്യം.അധികം നോക്കേണ്ടി വന്നില്ല..മുപ്പത്തിരണ്ടിഞ്ച് പാന്റ് ഇരുപത്തേഴിഞ്ചില്‍ വരിഞ്ഞു മുറുക്കിയപ്പോള്‍ ഉരുണ്ടുകൂടി മിച്ചം വന്ന പാന്റ്സിന്റെ ഭാഗങ്ങള്‍ മുന്‍വശത്ത് കേന്ദ്രസ്ഥാനത്തുതന്നെ മുഴച്ചു നില്‍ക്കുന്നു.ടേബിളിനു പിറകിലെ കസേരകളിലിരിക്കുന്ന മുതലാളികുടുംബം ആദ്യം കണ്ടിട്ടുണ്ടാവുക മുഴച്ചു നില്‍ക്കുന്ന മുന്‍ഭാഗമുള്ള പാന്റ്സാണെന്നത് വ്യക്തം.

ട്യൂഷന്‍ ശിഷ്യരായ അരുമക്കുട്ടികളും അവരുടെ മാതാപിതാക്കളും.ദേഷ്യം തുറന്നു പ്രകടിപ്പിച്ച് കൊച്ചിനോട് ഒച്ചയിട്ട മാഡം..ഭൂമി പിളര്‍ന്ന് താഴേക്കിറങ്ങി പോയെങ്കിലെന്ന് കൊതിച്ച നേരം.അങ്ങിനെയല്ല ഇങ്ങിനെയാണെന്ന് വിശദീകരിക്കാന്‍ കഴിയുന്ന ഒരു വിഷയമാണോ?തികച്ചും ബല്ലാത്തൊരു ഉത്ഥാനം😓